Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirilən 2025-ci il kiçik qrant müsabiqəsinin qalibi olan “Alternativ enerjidən istifadə texnologiyaları və təbii fəlakətlər zamanı tətbiqi üzrə məlumatlandırıcı kitabça və mobil tətbiq” adlı layihə çərçivəsində hazırlanan mobil tətbiq ictimaiyyətə təqdim edilib.

Layihə çərçivəsində yaradılan AzGreenMan adlı mobil tətbiq mühəndis alimlər, innovasiya mütəxəssisləri və universitet tələbələrinin birgə fəaliyyəti nəticəsində hazırlanıb və artıq Play Store platformasında istifadəyə verilib. Tətbiqin əsas məqsədi alternativ enerji sahəsinə maraq göstərən gəncləri, tələbələri və mütəxəssisləri maarifləndirmək, eləcə də enerji sahəsində innovativ yanaşmaları geniş ictimaiyyətə çatdırmaqdır.

AzGreenMan tətbiqinin funksionallıqları genişdir. Tətbiqdə Azərbaycan xəritəsi üzərindən bütün bölgələr üzrə iqlim riskləri, təbii fəlakət göstəriciləri və təhlükə səviyyələri real vaxtda təqdim olunur. Hazırlanmış xəbərdarlıq sistemi baş verə biləcək iqlim hadisələri və digər fövqəladə hallar barədə istifadəçilərə operativ şəkildə bildirişlər göndərir.

Bundan əlavə, tətbiqdə yaşıl texnologiyalardan istifadə edərək şəxsi enerji istehsalı barədə praktiki, addım-addım izahlar, müasir alternativ enerji qurğuları barədə məlumat bazası və təhlükəsizlik üzrə tövsiyələr yer alır. Həmçinin istifadəçilər üçün davamlı enerji sahəsində yenilikləri əks etdirən xəbər platforması da tətbiqə inteqrasiya olunub.

Layihə “Gənclərin Tərəqqisinə Dəstək” ictimai birliyinin gənc alim və tədqiqatçılarından ibarət komanda tərəfindən həyata keçirilib. Birlik nümayəndələrinin sözlərinə görə, bu tətbiq həm cəmiyyətin enerji savadlılığının artırılmasına, həm də ölkədə davamlı inkişaf üzrə maariflənməyə mühüm töhfə verəcək.