Tədbirdə universitetin tələbələri, gənc fəallar və müxtəlif ixtisaslar üzrə təhsil alan iştirakçılar böyük maraqla iştirak etmişlər.Tədbirin açılış hissəsində layihənin əsas məqsədi, aktuallığı və cəmiyyət üçün əhəmiyyəti barədə ətraflı məlumat verilmişdir. Bildirilmişdir ki, layihənin başlıca hədəfi innovativ və müasir yanaşmalar vasitəsilə gənclərin Azərbaycan Respublikasının Konstitusiyası haqqında biliklərini artırmaq, onların hüquqi düşüncə tərzini formalaşdırmaq və vətəndaş məsuliyyətini gücləndirməkdir.

Daha sonra layihə çərçivəsində hazırlanmış virtual simulyasiya platforması iştirakçılara təqdim olunmuşdur. Qeyd edilmişdir ki, bu platforma vasitəsilə gənclər müxtəlif hüquqi situasiyalar əsasında qərarvermə prosesində iştirak edir, real həyatda qarşılaşa biləcəkləri hüquqi məsələləri interaktiv şəkildə öyrənmək imkanı əldə edirlər. Bu yanaşma isə ənənəvi tədris metodlarından fərqli olaraq gənclərin mövzunu daha dərindən mənimsəməsinə şərait yaradır.

İnteraktiv görüş zamanı Konstitusiyanın əsas prinsipləri, vətəndaşların hüquq və vəzifələri, dövlət quruculuğunun əsasları kimi mövzular ətrafında geniş müzakirələr aparılmışdır. İştirakçılar öz fikirlərini sərbəst şəkildə ifadə etmiş, suallar vermiş və real nümunələr üzərində fikir mübadiləsi aparmışlar. Bu da tədbirin daha dinamik və faydalı keçməsinə töhfə vermişdir.

Tədbirin sonunda vurğulanmışdır ki, belə layihələr gənclərin hüquqi biliklərinin artırılması ilə yanaşı, onların aktiv və məsuliyyətli vətəndaş kimi formalaşmasında mühüm rol oynayır. Eyni zamanda qeyd olunmuşdur ki, “Konstitusiya Qərar Verir” layihəsi gələcəkdə də müxtəlif ali təhsil müəssisələrində davam etdirilərək daha geniş auditoriyanı əhatə etməyi hədəfləyir.