Təhsildə İnkişaf və İnnovasiyalar üzrə VIII qrant müsabiqəsinin qalibi olan “Next Step Sport” layihəsinin icrası başa çatıb, qaliblər mükafatlandırılıb. Layihənin bağlanış mərasimində iştirak edən layihənin eksperti Etiram Sadıqzadə layihənin şagirdlər üçün əhəmiyyətindən danışıb, məlumat verilib ki, dörd idman növü üzrə təşkil edilən idman yarışlarına 7-9-cu siniflərdə təhsil alan yüzdən çox məktəbli cəlb edilib.
Layihə rəhbəri, Göyçay rayon Qarabağlar kənd O.Rəhimov adına tam orta məktəbin idman müəllimi Nurlanə Quliyeva layihənin icrasına cəlb edilən ondan çox məktəbin nümayəndələrinə təşəkkür edib, bildirib ki, layihənin icrası şagirdlər arasında böyük maraqla qarşılanıb, onlarda rəqabət hissini gücləndirib.

Qeyd edək ki, “Next Step Sport” məktəblilərin idman festivalı layihəsinin məqsədi Göyçay şəhərində sağlam həyat tərzinin təşviqidir. Layihə çərçivəsində yüzdən çox şagird tennis, voleybol, uzağatullanma və qaçış idman növü üzrə öz gücünü sınayıb. Layihə Azərbaycan Respublikası Elm və Təhsil Nazirliyinin Təhsildə İnkişaf və İnnovasiyalar üzrə VIII qrant müsabiqəsi çərçivəsində maliyyələşdirilib.

Tədbirin sonunda layihə iştirakçıları sertifikatla, qalib komandalar isə kubok, medal və xüsusi hədiyyələrlə təltif ediliblər.