#Xəbərlər

Qeyri-Hökümət Təşkilatlarına Dövlət Dəstəyi Agentliyinin maliyyə dəstəyi və Müasir Gənclərin İnkişafına Dəstək İctimai Birliyinin təşkilatçılığı ilə həyata keçirilən “Həssas təbəqədən olan qadınların məşğulluğu” layihəsi başa çatıb.

Sumqayıt şəhərində icra olunan layihə çərçivəsində iştirakçılara nəzəri və praktiki olmaqla dörd modul üzrə təlimlər keçirilib.

İyirmi nəfər xanımın iştirak etdiyi layihənin məqsədi Sumqayıt şəhərində qadınların məşğulluq imkanlarının artırılması, onlarda müasir əmək bazarına uyğun bilik və bacarıqların formalaşmasına dəstək olmaqdır.

Layihənin bağlanış mərasimində iştirak edən layihə rəhbəri Hacı Mayılzadə iştirakçılara uğurlar arzu edib və bundan sonra da qadınların məşğulluq imkanlarının, sosial müdafiəsinin təmin edilməsi istiqamətində layihələr təşkil edəcəklərini bildirib.

Təlimlərin son günündə iştirakçılar sertifikatla təltif edilib.

Qeyd edək ki, “Həssas təbəqədən olan qadınların məşğulluğu” layihəsi Qeyri-Hökümət Təşkilatlarına Dövlət Dəstəyi Agentliyinin 2024-cü il üzrə elan etdiyi kiçik qrant müsabiqəsinin qalibi olub.