10 aprel 2025-ci il tarixində Azərbaycan Gənclər Fondunun maliyyə dəstəyi ilə həyata keçirilən “Visionary AI” layihəsinə rəsmi olaraq start verilib. Layihənin müəllifi, Azərbaycan Texnologiya Universitetinin magistrantı Həsənova Məlahət Elnur qızı, bu təşəbbüslə gənclərin süni intellekt texnologiyalarını öyrənməsi və praktik bacarıqlar qazanmasını hədəfləyir.
Layihənin əsas məqsədi gənclərə süni intellekt alətləri ilə işləmə bacarıqlarını öyrətmək və bu bacarıqları qısa videoməzmunlar vasitəsilə sosial şəbəkələrdə paylaşmaqdır. Təlimlər zamanı iştirakçılar süni intellekt vasitəsilə vizual dizayn, kontent yaradılması və video redaktə kimi sahələrdə biliklərini inkişaf etdirəcəklər.
Azərbaycan Gənclər Fondu tərəfindən 3300 manat məbləğində qrantla dəstəklənən “Visionary AI” layihəsi rəqəmsal savadlılığın artırılmasına, yaradıcılığın təşviqinə və gənclərin innovativ düşüncəyə yönləndirilməsinə xidmət edir.
Layihə çərçivəsində hazırlanacaq videolar Instagram, Facebook, YouTube kimi platformalarda paylaşılacaq və gənclər arasında süni intellektin faydalı istifadəsinə dair geniş maarifləndirmə işi aparılacaq.
Layihə müəllifi Həsənova Məlahət qeyd edib:
“Bu layihə ilə məqsədimiz gənclərə süni intellektin yalnız texnoloji tərəflərini deyil, onun yaradıcı potensialını da göstərməkdir. Azərbaycan Gənclər Fonduna bu imkan üçün təşəkkür edirəm.”
AZ 
